സെന്റർ ഓഫ് ഇന്ത്യൻ ട്രേഡ് യൂണിയൻസിൻ്റെ (സിഐടിയു) 17-ാമത് അഖിലേന്ത്യാ സമ്മേളനം ഇന്ന് ബെംഗളൂരുവിൽ ആരംഭിച്ചു. വിവിധ സംസ്ഥാനങ്ങളിൽ നിന്നായി 1500 പ്രതിനിധികൾ ഈ സമ്മേളനത്തിൽ പങ്കെടുക്കുന്നുണ്ട്. പൊതുമേഖലയുടെ സ്വകാര്യവൽക്കരണം അവസാനിപ്പിക്കുക, തൊഴിലാളികളെ അടിമകളാക്കാൻ ലക്ഷ്യമിട്ടുള്ള മോദി സർക്കാരിൻ്റെ പുതിയ തൊഴിൽ നിയമങ്ങൾക്കെതിരെ പോരാടുക, സർക്കാരിൻ്റെ കോർപ്പറേറ്റ് അനുകൂല, ജനവിരുദ്ധ നയങ്ങൾക്കെതിരെ പോരാട്ടം ശക്തമാക്കുക, തൊഴിലാളിവർഗ ഐക്യം ശക്തിപ്പെടുത്തുക തുടങ്ങിയ പ്രധാന വിഷയങ്ങൾ ഈ സമ്മേളനത്തിൽ ചർച്ച ചെയ്യപ്പെടും. വേൾഡ് ഫെഡറേഷൻ ഓഫ് ട്രേഡ് യൂണിയൻ (WFTU) ജനറൽ സെക്രട്ടറി പാംബിസ് കിരിറ്റ്സിസ് ഈ സമ്മേളനത്തെ അഭിസംബോധന ചെയ്ത് സംസാരിച്ചു. വിപ്ലവ നേതാവ് ചെഗുവേരയുടെ മകൾ സഖാവ് അലിദ ഗുവേര സമ്മേളനത്തെ അഭിസംബോധന ചെയ്യും. ഈ സമ്മേളനത്തിലേക്കുള്ള സൗഹാർദ്ദ പ്രതിനിധിയായി ജനറൽ സെക്രട്ടറി പി.അഭിമന്യു പങ്കെടുക്കുന്നുണ്ട്.